Молитвословия Триоди постной | Lehnik.ru

Молитвословия Триоди постной

Молитвословия Триоди постной

В неделю мытаря и фарисея

На утрене по Евангелии

Покая́ния отве́рзи ми две́ри, Жизнода́вче, у́тренюет бо дух мой ко хра́му свято́му Твоему́, храм нося́й теле́сный весь оскверне́н; но я́ко Щедр, очи́сти благоутро́бною Твое́ю ми́лостию.

На спасе́ния стези́ наста́ви мя, Богоро́дице, сту́дными бо окаля́х ду́шу грехми́ и в ле́ности все житие́ мое́ ижди́х; но Твои́ми моли́твами изба́ви мя от вся́кия нечистоты́.

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́.

Мно́жества соде́янных мно́ю лю́тых, помышля́я окая́нный, трепе́щу стра́шнаго дне су́днаго: но наде́яся на ми́лость благоутро́бия Твоего́, я́ко Дави́д вопию́ Ти: поми́луй мя, Бо́же, по вели́цей Твое́й ми́лости.

(Эти покаянные песни Церковь поет от Недели мытаря́ и фарисе́я до пятой Недели святой Четыредесятницы)

Кондак

Фарисе́ева убежи́м высокоглаго́лания, и мытаре́ве научи́мся высоте́ глаго́л смире́нных, покая́нием взыва́юще: Спа́се ми́ра, очи́сти рабы́ Твоя́.

***

В Неделю блудного сына

На утрене псалом 136

На река́х вавило́нских, та́мо седо́хом и пла́кахом, внегда́ помяну́ти нам Сио́на. На ве́рбиих посреде́ его́ обе́сихом орга́ны на́ша. Яко та́мо вопроси́ша ны пле́ншии нас о словесе́х пе́сней и ве́дшии нас о пе́нии: воспо́йте нам от пе́сней Сио́нских. Ка́ко воспое́м песнь Госпо́дню на земли́ чужде́й? Аще забу́ду тебе́, Иерусали́ме, забве́на бу́ди десни́ца моя́. Прильпни́ язы́к мой горта́ни моему́, а́ще не помяну́ тебе́, а́ще не предложу́ Иерусали́ма, я́ко в нача́ле весе́лия моего́. Помяни́, Го́споди, сыны́ Едо́мския, в день Иерусали́мль глаго́лющия: истоща́йте, истоща́йте до основа́ний его́. Дщи вавило́ня окая́нная, блаже́н, и́же возда́ст тебе́ воздая́ние твое́, е́же воздала́ еси́ нам. Блаже́н, и́же и́мет и разбие́т младе́нцы твоя́ о ка́мень.

Седален по 3-й песни

Объя́тия О́тча отве́рсти ми потщи́ся, блу́дно ижди́х мое́ житие́, на бога́тство не иждива́емое взира́яй щедро́т Твои́х, Спа́се, ны́не обнища́вшее мое́ се́рдце не пре́зри. Тебе́ бо, Го́споди, во умиле́нии зову́: согреши́х, Отче, на не́бо и пред Тобо́ю.

Кондак по 6-й песни

Оте́ческия сла́вы Твоея́ удали́хся безу́мно, в злых расточи́в е́же ми пре́дал еси́ бога́тство. Те́мже Ти блу́днаго глас приношу́: согреши́х пред Тобо́ю, Отче ще́дрый, приими́ мя ка́ющася и сотвори́ мя я́ко еди́наго от нае́мник Твои́х.

***

В Неделю мясопустную

На утрене седален по 3-й песни

Помышля́ю день стра́шный и пла́чуся дея́ний мои́х лука́вых: ка́ко отвеща́ю Безсме́ртному Царю́; ко́им же дерзнове́нием воззрю́ на Судию́, блу́дный аз; Благоутро́бный Отче, Сы́не Единоро́дный, Ду́ше Святы́й, поми́луй мя.

Кондак по 6-й песни

Егда́ прии́деши, Бо́же, на зе́млю со сла́вою, и трепе́щут вся́ческая, река́ же о́гненная пред суди́щем влече́т, кни́ги разгиба́ются, и та́йная явля́ются, тогда́ изба́ви мя от огня́неугаси́маго и сподо́би мя одесну́ю Тебе́ ста́ти, Судие́ Пра́веднейший.

***

В Неделю сыропустную

На утрене седален по 3-й песни

Изгнан бысть Ада́м от ра́йския сла́дости, сне́дию го́рькою в невоздер жа́нии за́поведи не сохрани́ Влады́чни и осуди́ся де́лати зе́млю, от нея́же взят бысть сам, по́том же мно́гим я́сти хлеб свой. Те́мже мы возлю́бим воздержа́ние, да не вне рая́ возрыда́им, я́коже он, но в него́ вни́дем.

Кондак по 6-й песни

Прему́дрости Наста́вниче, смы́сла Пода́телю, нему́дрых Наказа́телю и ни́щих Защи́тителю, утверди́, вразуми́ се́рдце мое́, Влады́ко. Ты даждь ми сло́во, Отчее Сло́во, се бо устне́ мои́ не возбраню́, во е́же зва́ти Тебе́: Ми́лостиве, поми́луй мя па́дшаго.

На вечерне

Проки́мен, глас 8: Не отврати́ лица́ Твоего́ от о́трока Твоего́, я́ко скорблю́, ско́ро услы́ши мя; вонми́ души́ мое́й и изба́ви ю́.

Стих: Спасение Твое, Боже, да прии́мет мя.

Стих: Да у́зрят нищии и возвеселятся.

Стих: Взыщи́те Бога, и жива́ будет душа́ ваша.

Молитва святого Ефрема Сирина

Го́споди и Влады́ко живота́ моего́, дух пра́здности, уны́ния, любонача́лия и праздносло́вия не даждь ми. (Поклон земной)

Дух же целому́дрия, смиренному́дрия, терпе́ния и любве́ да́руй ми, рабу́ Твоему́. (Поклон земной)

Ей, Го́споди Царю́, да́руй ми зре́ти моя́ прегреше́ния и не осужда́ти бра́та моего́, я́ко благослове́н еси́во ве́ки веко́в. Аминь. (Поклон земной)

Бо́же, очи́сти мя гре́шнаго (12 раз с поясными поклонами), потом всю молитву: Го́споди и Влады́ко живота́ моего́… и один земной поклон при конце. (Эта молитва читается на часа́х в среду и пятницу Сы́рной седми́цы и во всю святу́ю Четыредеся́тницу, кроме суббот и воскресений.)

***

Седмица 1-я святой Четыредесятницы

В понедельник, на великом повечерии

Ирмосы Великого канона Андрея Критского

1. Помо́щник и Покрови́тель бысть мне во спасе́ние, Сей мой Бог, и просла́влю Его́, Бог отца́ моего́, и вознесу́ Его́: сла́вно бо просла́вися.

2. Вонми́, не́бо, и возглаго́лю, и воспо́ю Христа́, от Де́вы пло́тию прише́дшаго.

3. На недви́жимом, Христе́, ка́мени за́поведей Твои́х утверди́ мое́ помышле́ние.

4. Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и челове́ком яви́тися, и глаго́лаше: услы́шах слух Твой и убоя́хся; сла́ва си́ле Твое́й, Го́споди.

5. От но́щи у́тренююща, Человеколю́бче, просвети́, молю́ся, и наста́ви и мене́ на повеле́ния Твоя́; и научи́ мя, Спа́се, твори́ти во́лю Твою́.

6. Возопи́х всем се́рдцем мои́м к Ще́дрому Бо́гу, и услы́ша мя от а́да преиспо́дняго, и возведе́ от тли живо́т мой.

Кондак по 6-й песни

Душе́ моя́, душе́ моя́, воста́ни, что спи́ши; коне́ц приближа́ется, и и́маши смути́тися; воспряни́ у́бо, да пощади́т Тя Христо́с Бог, везде́ сый и вся исполня́яй.

7. Согреши́хом, беззако́нновахом, непра́вдовахом пред Тобо́ю, ниже́ соблюдо́хом, ниже́ сотвори́хом, я́коже запове́дал еси́ нам; но не преда́ждь нас до конца́, отце́в Бо́же.

8. Его́же во́инства Небе́сная сла́вят, и трепе́щут Херуви́ми и Серафи́ми, вся́ко дыха́ние и тварь, по́йте, благослови́те и превозноси́те во вся ве́ки.

9. Безсе́меннаго зача́тия рождество́ несказа́нное, Ма́тере безму́жныя нетле́нен Плод, Бо́жие бо рожде́ние обновля́ет естества́. Те́мже Тя вси ро́ди, я́ко Богоневе́стную Ма́терь, правосла́вно велича́ем.

(Ирмосы эти поют на великом повечерии в понедельник, вторник, среду и четверг первой седмицы Великого поста)

Из последования великого повечерия

Пресвята́я Влады́чице Богоро́дице, моли́ о нас, гре́шных.

Вся Небе́сныя Си́лы святы́х Ангел и Арха́нгел, моли́те о нас, гре́шных.

Святы́й Иоа́нне проро́че, и Предте́че, и Крести́телю Го́спода на́шего Иису́са Христа́, моли́ о нас, гре́шных.

Святи́и сла́внии апо́столи, проро́цы, и му́ченицы, и вси святи́и, моли́те о нас, гре́шных.

Преподо́бнии и бого́носнии отцы́ на́ши, па́стырие и учи́телие вселе́нныя, моли́те о нас, гре́шных.

Непобеди́мая, и непости́жимая, и Боже́ственная си́ло Честна́го и Животворя́щаго Креста́, не оста́ви нас, гре́шных.

Бо́же, очи́сти нас, гре́шных.

Бо́же, очи́сти нас, гре́шных, и поми́луй нас.

Тропари, глас 6

Го́споди Сил, с на́ми бу́ди, ино́го бо ра́зве Тебе́ Помо́щника в ско́рбех не и́мамы: Го́споди Сил, поми́луй нас.

Хвали́те Бо́га во святы́х Его́, хвали́те Его́ во утверже́нии си́лы Его́.

Хвали́те Его́ на си́лах Его́, хвали́те Его́ по мно́жеству вели́чествия Его́.

Хвали́те Его́ во гла́се тру́бнем, хвали́те Его́ во псалти́ри и гу́слех.

Хвали́те Его́в тимпа́не и ли́це, хвали́те Его́ во стру́нах и орга́не.

Хвали́те Его́в кимва́лех доброгла́сных, хвали́те Его́в кимва́лех восклица́ния. Вся́кое дыха́ние да хва́лит Го́спода.

(К каждому стиху прилагается: Го́споди Си́л…)

Слава: Го́споди, а́ще не бы́хом святы́я Твоя́ име́ли моли́твенники и благосты́ню Твою́, ми́лующую нас, ка́ко сме́ли бы́хом, Спа́се, пе́ти Тя, Его́же славосло́вят непреста́нно Ангели; Сердцеве́дче, пощади́ ду́ши на́ша.

И ныне: Мно́гая мно́жества мои́х, Богоро́дице, прегреше́ний, к Тебе́ прибего́х, Чи́стая, спасе́ния тре́буя. Посети́ немощству́ющую мою́ ду́шу и моли́ Сы́на Твоего́ и Бо́га на́шего да́ти ми оставле́ние, я́же соде́ях лю́тых, Еди́на Благослове́нная.

Всесвята́я Богоро́дице, во вре́мя живота́ моего́ не оста́ви мене́, челове́ческому предста́тельству не вве́ри мя, но Сама́ заступи́, и поми́луй мя.

Все упова́ние мое́ на Тя возлага́ю, Ма́ти Бо́жия, сохрани́ мя под кро́вом Твои́м.

***

В среду первой седмицы

Стихира на вечерне

Постя́щеся, бра́тие, теле́сне, пости́мся и духо́вне: разреши́м вся́кий сою́з непра́вды, расто́ргнем стро́потная ну́ждных измене́ний, вся́кое списа́ние непра́ведное раздере́м, дади́м а́лчущим хлеб и ни́щия безкро́вныя введе́м в до́мы, да прии́мем от Христа́ Бо́га ве́лию ми́лость.

На литургии Преждеосвященных Даров

Да испра́вится моли́тва моя́, я́ко кади́ло пред Тобо́ю, воздея́ние руку́ мое́ю, же́ртва вече́рняя.

Го́споди, воззва́х к Тебе́, услы́ши мя, вонми́ гла́су моле́ния моего́, внегда́ воззва́ти ми к Тебе́.

Положи́, Го́споди, хране́ние усто́м мои́м и дверь огражде́ния о устна́х мои́х.

Не уклони́ се́рдце мое́ в словеса́ лука́вствия, непщева́ти вины́ о гресе́х.

Вместо Херувимской песни

Ны́не Си́лы Небе́сныя с на́ми неви́димо слу́жат: се бо вхо́дит Царь Сла́вы, се, Же́ртва Та́йная соверше́на дорино́сится. Ве́рою и любо́вию присту́пим, да прича́стницы жи́зни ве́чныя бу́дем. Аллилуиа, аллилуиа, аллилуиа.

***

Неделя 1-я святой Четыредесятницы

Торжество Православия

Тропарь, глас 2

Пречи́стому о́бразу Твоему́ покланя́емся, Благи́й, прося́ще проще́ния прегреше́ний на́ших, Христе́ Бо́же; во́лею бо благоволи́л еси́ пло́тию взы́ти на Крест, да изба́виши, я́же созда́л еси́, от рабо́ты вра́жия. Тем благода́рственно вопие́м Ти: ра́дости испо́лнил еси́ вся, Спа́се наш, прише́дый спасти́ мир.

Кондак, глас 2

Неопи́санное Сло́во Отчее из Тебе́, Богоро́дице, описа́ся воплоща́емь, и оскве́рншийся о́браз в дре́внее вообрази́в, Боже́ственною добро́тою смеси́. Но испове́дающе спасе́ние, де́лом и сло́вом, сие́ вообража́ем.

***

Неделя 2-я святой Четыредесятницы

Святителя Григория Паламы, архиепископа Фессалонитского

Тропарь, глас 8

Православия свети́льниче, Це́ркве утверждение и учи́телю, монахов добро́то, богословов побо́рниче непребори́мый, Григорие чудотво́рче, Фессалони́тская похвало́, пропове́дниче благода́ти, моли́ся вы́ну спастися душа́м нашим.

Кондак, глас 8

Премудрости священный и Божественный орга́н, богословия светлую согласно трубу́, воспеваем тя, Григорие богоглаго́льниче: но яко ум, Уму́ первому предстоя́й, к Нему ум наш, о́тче, настави, да зовем: радуйся, пропове́дниче благодати.

***

Неделя 3-я святой Четыредесятницы

Крестопоклонная

Тропарь, глас 1

Спаси, Господи, люди Твоя и благослови достоя́ние Твое, победы на сопроти́вныя да́руя, и Твое сохраняя Крестом Твоим жи́тельство.

Кондак, глас 7

Не ктому́ пла́менное оружие хранит врат Еде́мских: на ты́я бо на́йде преславный со́уз, дре́во крестное, смертное жа́ло и а́дова победа прогна́ся, предста́л бо еси́, Спасе мой, вопия́ су́щим во аде: вни́дите па́ки в рай.

Тропарь на поклонение Кресту

Кресту Твоему покланя́емся, Владыко, и свято́е Воскресение Твое сла́вим.

***

Неделя 4-я святой Четыредесятницы

Преподобного Иоанна Лествичника

Тропарь, глас 1

Пусты́нный житель и в телеси́ Ангел, и чудотво́рец явился еси́, богоно́се отче наш Иоа́нне; посто́м, бде́нием, молитвою небесная дарова́ния прии́м, исцеляеши неду́жныя и души верою притека́ющих ти. Слава Давшему ти крепость, слава Венча́вшему тя, слава Де́йствующему тобою всем исцеле́ния.

Кондак, глас 4

На высоте Господь воздержа́ния и́стинна тя положи́, я́ко же звезду́ неле́стную, световодя́щую концы, наста́вниче, Иоанне, отче наш.

***

Суббота 5-й седмицы

Похвала Пресвятой Богородицы

Тропарь, глас 8

Повеле́нное тайно прие́м в разуме, в кро́ве Ио́сифове тща́нием предста́ безпло́тный, глаго́ля Неискусобра́чней: приклони́вый схожде́нием небеса́ вмеща́ется неизме́нно весь в Тя. Его́ же и видя в ложесна́х Твоих прие́мша ра́бий зрак, ужасаюся зва́ти Тебе: радуйся, Невесто Неневе́стная.

Кондак, глас 8

Взбра́нной Воево́де победи́тельная, яко изба́вльшеся от злых, благодарственная воспису́ем Ти раби́ Твои, Богородице; но яко иму́щая державу непобеди́мую, от всяких нас бед свободи́, да зове́м Ти: радуйся, Невесто Неневе́стная.

***

Неделя 5-я святой Четыредесятницы

Преподобной Марии Египетской

Тропарь, глас 8

В тебе, ма́ти, изве́стно спасе́ся е́же по образу; при́имши бо крест, после́довала еси́ Христу, и де́ющи учила еси́ презира́ти у́бо плоть, прехо́дит бо, прилежа́ти же о души́, ве́щи безсме́ртней. Те́м же и со Ангелы сра́дуется, преподобная Мари́е, дух твой.

Кондак, глас 3

Блуда́ми пе́рвее преиспо́лнена всяческими, Христова невеста днесь покаянием яви́ся, ангельское жительство подража́ющи, де́моны оружием креста погубля́ет. Сего́ ради Царствия невеста яви́лася еси́, Мари́е пресла́вная.

***

Пятница 6-й седмицы

Стихира на вечерне, глас 8

Душеполе́зную соверши́вше Четыредеся́тницу, и святую седми́цу страсти Твоея́ про́сим ви́дети, Человеколю́бче, е́же просла́вити в ней вели́чия Твоя́ и неизрече́нное нас ради смотрение Твое, единому́дренно воспева́юще: Господи, слава Тебе.

***

Суббота 6-й седмицы, Лазарева

Тропарь, глас 1

Общее воскресение прежде Твоея́ страсти уверя́я, из мертвых воздви́гл еси́ Лазаря, Христе Боже. Те́м же и мы, яко отроцы победы зна́мения нося́ще, Тебе, победи́телю смерти, вопие́м: оса́нна в вышних, благослове́н Гряды́й во имя Господне.

Кондак, глас 2

Всех радость Христос, Истина, Свет, Живот и мира воскресение, су́щим на земли́ ви́ся Свое́ю бла́гостию, и бысть образ воскресе́ния, всем подая́ боже́ственное оставле́ние.

***

Неделя Ваий (Вербное воскресенье)

Вход Господень в Иерусалим

На великой вечерне стихира, глас 6

Днесь благодать Свята́го Ду́ха нас собра́, и вси, взе́мше Крест Твой, глаго́лем: благословен Гряды́й во имя Господне, оса́нна в вышних.

Тропари, глас 1-й и 4-й

Общее воскресе́ние пре́жде Твоея́ стра́сти уверя́я, из ме́ртвых воздви́гл еси́ Ла́заря, Христе́ Боже. Те́мже и мы, я́ко о́троцы побе́ды зна́мения нося́ще, Тебе́, Победи́телю сме́рти, вопие́м: оса́нна в вы́шних, благослове́н Гряды́й во и́мя Госпо́дне.

Спогре́бшеся Тебе креще́нием, Христе Боже наш, безсме́ртныя жи́зни сподо́бихомся воскресе́нием Твоим, и воспева́юще зове́м: оса́нна в вышних, благослове́н Гряды́й во имя Господне.

Кондак, глас 6-й

На Престо́ле на небеси́, на жребя́ти на земли́ носи́мый, Христе Боже, Ангелов хвале́ние и дете́й воспева́ние прия́л еси́, зову́щих Ти: благослове́н еси́, Гряды́й Ада́ма воззва́ти.

***

В Великий Понедельник, Вторник и Среду

На утрене тропарь, глас 8

Се, Жених гряде́т в полу́нощи, и блажен раб, его́же обря́щет бдя́ща; недостоин же па́ки, его́же обря́щет уныва́юща. Блюди́ у́бо, душе́ моя, не сном отяготи́ся, да не сме́рти предана́ бу́деши, и Ца́рствия вне затвори́шися, но воспряни́ зову́щи: Свят, Свят, Свят еси́, Боже, Богородицею помилуй нас.

Ексапостиларий

Черто́г Твой ви́жду, Спасе мой, украше́нный, и оде́жды не и́мам, да вни́ду вонь: просвети́ одея́ние души́ моея́, Светода́вче, и спаси мя.

***

В Великий Четверг и Пятницу

На утрене тропарь, глас 8

Егда́ сла́внии ученицы́ на умове́нии ве́чери просвеща́хуся, тогда Иуда злочести́вый сребролю́бием неду́говав омрача́шеся и беззако́нным судия́м Тебе, Праведнаго Судию́, предае́т. Виждь, име́ний рачи́телю, сих ради удавле́ние употреби́вша! Бежи́ несы́тыя ду́ши, Учителю такова́я дерзну́вшия. Иже о всех Благий, Господи, слава Тебе.

***

В Великий Четверг

Вместо Херувимской песни и причастного стиха

Ве́чери Твоея́ та́йныя днесь, Сыне Божий, прича́стника мя приими́: не бо враго́м Твои́м та́йну пове́м, ни лобза́ния Ти дам, яко Иуда, но я́ко разбо́йник испове́даю Тя: помяни́ мя, Господи, во Царствии Твоем.

***

В Великую Пятницу на утрене

Тропарь во отпуст, глас 4

Искупи́л ны еси́ от клятвы зако́нныя Честно́ю Твое́ю Кро́вию, на Кресте пригвозди́вся и копие́м пробо́дся, безсмертие источи́л еси́ человеком, Спасе наш, слава Тебе.

Кондак, глас 8

Нас ради Распя́таго, прииди́те, вси воспо́им: Того бо ви́де Мария на дре́ве и глаго́лаше: аще и распя́тие терпи́ши, Ты еси́ Сын и Бог Мой.

Ексапостиларий

Разбо́йника благоразу́мнаго во еди́ном часе́ ра́еви сподо́бил еси́, Господи, и мене́ древом крестным просвети́ и спаси мя.

Тропарь на 6-м часе

Спасение соде́лал еси́ посреде́ земли́, Христе Боже, на Кресте пречи́стеи ру́це Твои просте́рл еси́, собира́я вся язы́ки, зову́щия: Господи, слава Тебе.

Стихира на вечерне

Тебе оде́ющагося светом яко ри́зою, снем Иосиф с древа с Никоди́мом, и видев мертва, на́га, не погребе́на, благосе́рдный плач восприи́м, рыда́я, глаго́лаше: увы мне, Сладчайший Иисусе, Его́же вма́ле солнце на кресте ви́сима узревшее, мраком облага́шеся, и земля страхом колеба́шеся, и раздира́шеся церко́вная заве́са; но се ныне вижу Тя, мене́ ради во́лею подъе́мша смерть. Ка́ко погребу Тя, Боже мой, или́ какою плащани́цею обвию́? Ко́има ли рука́ма прикоснуся нетленному Твоему Телу, или́ ки́я песни воспою Твоему исхо́ду, Ще́дре? Велича́ю страсти Твоя, песносло́влю и погребение Твое со воскресением, зовы́й: Господи, слава Тебе.

Стихира на целование Плащаницы

Прииди́те, ублажи́м Ио́сифа приснопа́мятнаго, в нощи́ к Пила́ту прише́дшаго и Живота́ всех испроси́вшаго: даждь ми Сего стра́ннаго, Иже не имеет где главы́ подклони́ти; даждь ми Сего стра́ннаго, Его́же ученик лука́вый на смерть предаде́; даждь ми Сего стра́ннаго, Его́же Ма́ти зря́щи на кресте́ ви́сяща, рыда́ющи вопия́ше и ма́терски восклица́ше: увы Мне, Ча́до Мое! Увы Мне, Све́те Мой и утро́ба Моя возлю́бленная! Симео́ном бо предрече́нное в церкви днесь собы́стся: Мое сердце оружие про́йде, но в радость Воскресения Твоего плач преложи́. Покланя́емся страсте́м Твоим, Христе, покланя́емся страсте́м Твоим, Христе, покланяемся страсте́м Твоим, Христе, и Святому Воскресению.

***

В Великую Субботу

На Бог Господь, тропарь, глас 2

Благообра́зный Ио́сиф, с древа снем Пречистое Тело Твое, плащани́цею чистою обви́в, и воня́ми во гробе но́ве покрыв, положи.

Слава: Егда́ снизше́л еси́ к смерти, Животе́ Безсме́ртный, тогда ад умертви́л еси́ блиста́нием Божества́. Егда́же и уме́ршия от преиспо́дних воскреси́л еси́, вся Силы Небесныя взыва́ху: Жизнода́вче, Христе́ Боже наш, слава Тебе.

И ныне: Мироно́сицам жена́м, при гробе предста́в, Ангел вопия́ше: ми́ра мертвым суть прилична, Христос же истле́ния яви́ся чужд.

На литургии вместо Херувимской песни тропарь, глас 8

Да молчи́т всякая плоть челове́ча, и да стои́т со стра́хом и тре́петом, и ничто́же земно́е в себе да помышля́ет: Царь бо ца́рствующих и Господь госпо́дствующих приходит закла́тися и да́тися в снедь ве́рным. Предхо́дят же Сему́ ли́цы Ангельстии со всяким Нача́лом и Вла́стию, многоочи́тии Херуви́ми и шестокрила́тии Серафи́ми, лица закрывающе и вопию́ще песнь: Аллилуиа, аллилуиа, аллилуиа.

Tags:
Leave a Comment